Road Accident : ఘోర రోడ్డు ప్రమాదం.. ఐదుగురు మృతి.. 41మందికి గాయాలు

Road Accident : మహారాష్ట్రలోని నాసిక్‌లో ఘోర రోడ్డు ప్రమాదం జరిగింది. జిల్లాలోని ముంబై-ఆగ్రా హైవేపై రాష్ట్ర రవాణా బస్సు ట్రక్కును ఢీకొట్టింది. ఈ ప్రమాదంలో కనీసం ఐదుగురు మరణించారు. 41 మంది గాయపడ్డారు. గాయపడిన వారిలో తొమ్మిది మంది పరిస్థితి విషమంగా ఉంది. మృతుల్లో ఇద్దరు సీనియర్ సిటిజన్లు, 14 ఏళ్ల బాలుడు, ఇద్దరు పురుషులు, బస్సు కండక్టర్ ఉన్నారు. ఉదయం 9:45 గంటల ప్రాంతంలో చందవాడ్ నగర శివార్లలో ఈ ప్రమాదం జరిగింది. మహారాష్ట్ర రాష్ట్ర రోడ్డు రవాణా సంస్థ (ఎంఎస్‌ఆర్‌టీసీ) బస్సు జలగావ్ జిల్లాలోని భుసావల్ నుంచి నాసిక్ నగరానికి వెళ్తోంది. హైవేపై గూడ్స్ లారీని ఓవర్‌టేక్ చేసేందుకు బస్సు డ్రైవర్ ప్రయత్నించడంతో ఈ ప్రమాదం జరిగింది. చంద్‌వాడ్ పోలీస్ స్టేషన్‌కు చెందిన పోలీసు ఇన్‌స్పెక్టర్ కైలాష్ వాఘ్ మాట్లాడుతూ.. ఢీకొనడం చాలా బలంగా ఉందని, బస్సు ముందు ఎడమ వైపు భాగం బాగా దెబ్బతింది. దీంతో బస్సులో ప్రయాణిస్తున్న పలువురు ప్రయాణికులు చిక్కుకుపోయారు. సహాయం కోసం స్థానిక పోలీసులు, అగ్నిమాపక దళాన్ని పిలిచారు.

గాయపడిన ప్రయాణికులను తక్షణ చికిత్స కోసం చాంద్‌వాడ్ ప్రభుత్వ ఆసుపత్రి, ఇతర ప్రైవేట్ ఆసుపత్రులకు తరలించారు. అక్కడ 9 మంది పరిస్థితి విషమంగా ఉంది. మృతులను థానేలోని భివాండి నగరానికి చెందిన ఖలీదా గులాం హుస్సేన్, బడేరామ్ సోను అహిరే, నాసిక్‌కు చెందిన సురేష్ తుకారాం సావంత్, సాహిల్, జల్గావ్‌కు చెందిన సంజయ్ దేవ్రేగా గుర్తించినట్లు ఆయన తెలిపారు. గాయపడిన 17 మంది ప్రయాణికులకు కంపెనీ తక్షణమే 15,000 రూపాయల ఎక్స్‌గ్రేషియా చెల్లించింది. వేగంగా వెళ్తున్న బస్సును ఎడమవైపు నుంచి ట్రక్కు ఢీకొట్టింది. బస్సులో మొత్తం 45 మంది ప్రయాణికులు ఉన్నారు. ప్రయాణికులు కోలుకోవడానికి కూడా సమయం దొరకని విధంగా ప్రమాదం జరిగింది. బస్సు అదుపు తప్పి చాలా మంది కింద పడిపోయారు. ప్రమాదం అనంతరం ఈ రహదారిపై రాకపోకలు పూర్తిగా నిలిచిపోయాయి. అనంతరం ప్రమాదానికి గురైన బస్సును రూట్ నుంచి తొలగించే పనులను ప్రారంభించారు. బస్సును పక్కకు లాగడంతో ఈ మార్గంలో ట్రాఫిక్‌ను పునరుద్ధరించారు.