Vladimir Putin : జైలుకు రష్యా డిప్యూటీ డిఫెన్స్ మినిస్టర్.. కారణం ఇదే ?

Vladimir Putin : ఉక్రెయిన్‌తో యుద్ధాన్ని ఎదుర్కొంటున్న రష్యాలో పెను అలజడి నెలకొంది. ఇక్కడ రష్యా సైన్యం ఒక అవినీతి కేసులో సైనిక నిర్మాణానికి బాధ్యత వహించే డిప్యూటీ డిఫెన్స్ మినిస్టర్‌ను అదుపులోకి తీసుకుంది. పెద్ద ఎత్తున లంచం తీసుకున్నట్లు ఆరోపణలు ఉన్నాయి. ఫిబ్రవరి 2022లో ఉక్రెయిన్, రష్యా మధ్య ప్రారంభమైన యుద్ధం మధ్య పుతిన్ చేసిన అతిపెద్ద చర్య ఇది. ఎనిమిదేళ్లుగా రష్యాలో ఈ పోస్టులో పనిచేస్తున్నాడు. అతను తూర్పు ఉక్రెయిన్‌కు ఇన్‌ఛార్జ్‌గా ఉన్నాడు, అక్కడ అతను ప్రధాన ప్రాజెక్టులను నిర్వహిస్తున్నాడు. రష్యా డిప్యూటీ డిఫెన్స్ మినిస్టర్ తైమూర్ వాడిమోవిచ్ ఇవనోవ్‌ను అదుపులోకి తీసుకున్నామని, అతనిపై విచారణ కొనసాగుతోందని రష్యా అత్యున్నత దర్యాప్తు సంస్థ మంగళవారం అర్థరాత్రి ఒక ప్రకటనలో తెలిపింది. ఎనిమిదేళ్లుగా పదవిలో ఉన్న తైమూర్ వాడిమోవిచ్ ఇవనోవ్.. పెద్ద ఎత్తున లంచాలు తీసుకున్నట్లు ఆరోపణలు వచ్చాయి.

2022లో దివంగత రష్యా ప్రతిపక్ష నాయకుడు అలెక్సీ నవల్నీ నేతృత్వంలోని రష్యా యాంటీ కరప్షన్ ఫౌండేషన్, ఇవనోవ్, అతని కుటుంబం రియల్ ఎస్టేట్, లగ్జరీ ట్రిప్‌లు, డిజైనర్ దుస్తులపై విపరీతంగా ఖర్చు చేస్తున్నారని ఆరోపించింది. తూర్పు ఉక్రెయిన్ నగరమైన మారియుపోల్‌ను పునర్నిర్మించడానికి ఇవనోవ్ ప్రధాన నిర్మాణ ప్రాజెక్టులకు బాధ్యత వహిస్తున్నట్లు రష్యన్ మీడియా నివేదించింది. ఈ ప్రాంతంపై రష్యా భారీ బాంబు దాడి తరువాత, పుతిన్ ఆర్మీ దానిలో కొంత భాగాన్ని స్వాధీనం చేసుకుంది. ఇవనోవ్ నిర్బంధానికి సంబంధించిన నివేదికను అధ్యక్షుడు వ్లాదిమిర్ పుతిన్‌కు సమర్పించినట్లు క్రెమ్లిన్ ప్రతినిధి డిమిత్రి పెస్కోవ్ రష్యా వార్తా సంస్థలను ఉటంకిస్తూ చెప్పారు. అతని ఆదేశాల తర్వాత మాత్రమే తైమూర్ వాడిమోవిచ్ ను అదుపులోకి తీసుకున్నారు. అతని నిర్బంధం గురించి రక్షణ మంత్రి సెర్గీ షోయిగుకు ఇప్పటికే సమాచారం అందించినట్లు ఆయన చెప్పారు.