న్యూస్ లైన్ డెస్క్: దేశంలో హోమ్ మంత్రి, విద్యాశాఖ మంత్రి లేని రాష్ట్రం ఏదైనా ఉంది అంటే అది తెలంగాణ మాత్రమే అని బీఆర్‌ఎస్ నాయకుడు ఆర్‌ఎస్ ప్రవీణ్ కుమార్ అన్నారు. శుక్రవారం తెలంగాణ భవన్‌లో ఆయన ప్రెస్ మీట్ నిర్వహించారు. ఈ సందర్భంగా ప్రవీణ్ కుమార్ మాట్లాడుతూ ముఖ్యమంత్రి రేవంత్ రెడ్డి హోమ్ శాఖ, విద్యాశాఖ, ఎస్సీ సంక్షేమ శాఖ, రకరకాల శాఖలు తన గుప్పెట్లో పెట్టుకుని రాష్ట్రాన్ని పూర్తిగా అభద్రతా భావంతో బ్రతికెలాగ చేస్తున్నాడాని విమర్శించారు. గత 24 గంటల్లో 5 హత్యలు, 2 హత్యాప్రయత్నాలు అంటే శాంతి భద్రత వ్యవస్థ ఎక్కడ ఉంది? పోలీసులు ఎక్కడికి పోయారు అని ప్రశ్నించారు. పోలీసులు దేంట్లో బిజీ ఉన్నారు అంటే రేవతి అనే ఒక జర్నలిస్ట్ కరెంటు లేదని ట్వీట్ చేస్తే ఆమె మీద సెక్షన్ 505, సెక్షన్ 66 ఐటీ యాక్ట్ కింద పోలీసులు కేసు పెట్టే పనిలో ఉన్నారన్నారు. 505 సెక్షన్ అనేది ప్రజల మీద భయాందోళనలు సృష్టించి, విద్వేషం రగిలించి, ప్రజలు రెండు గ్రూపులుగా విడిపోయి ఒకరిని ఒకరు కొట్టుకోడానికి ప్రేరేపిస్తే అప్పుడు ఆ సెక్షన్ పెట్టాలని. కానీ ఇవాళ రేవంత్ రెడ్డి అదేశాలు ఏంటి అంటే ప్రశ్నించే వాళ్లు జర్నలిస్టులైన సరే, గృహిణులు అయినా, విద్యార్థులు అయినా సరే కేసులు పెట్టండని పోలీసులకు చెప్పాడని ఆరోపణలు చేశారు. కొల్లాపూర్‌లోని మూల్చింతలపల్లి గ్రామంలో ఓ గిరిజన మహిళను వారం రోజులుగా కిడ్నప్ చేసి అత్యాచారం చేస్తుంటే కనీసం పోలీసులకు ఈ మాత్రం సమాచారం లేకపోవటమనేది ఈ రాష్ట్రంలో భద్రత వ్యవస్థ, ఇంటెలిజెన్స్ వ్యవస్థ, సమాచరణ సేకరణ వ్యవస్థ ఎంత ఘోరంగా ఉన్నది అనేది ఈ విషయంతో మనకు అర్థం అవుతుందన్నారు. రాష్ట్ర ప్రభుత్వం వెంటనే హోమ్ శాఖ, విద్యాశాఖ మంత్రిని నియమించాలని ఆయన డిమాండ్ చేశారు.
